العاشره مساءً - الشاعر جمال بخيت و قصيدته"مش باقي مني "

العاشره مساءً - الشاعر جمال بخيت و قصيدته"مش باقي مني "

مش باقي مني
مش باقي مني غير شوية ضي فى عنيه
أنا هدهملك وأمشي بصبري فى الملكوت
يمكن في نورهم تلمحي خطوة
تفرق معاكي بين الحياه والموت
مش باقي مني غير شوية نبض في عروقي
خدي وعيشي
وافتحيلي تبوت
أفرح بريحة ورد فرعوني
وربنا في عوني
إذا دخلت الجنه ولا النار
هاشتاق لضحكتك
وقعدتي فى الدار
والقهوة متحوجة مطيبة العطار
في كل يوم الصبح أشرب حليب قبطي
وفي النهار والمسا أمسك ستار الكعبة لو سبتي
واثبت إذا هربتي
اهديكي عمرى وحسي وجورحي
اهديكي جرحي
هو اللى باقي في دنيتي لما خلص فرحي
مش باقي مني غير شوية لحم فى كتافي
بلاش يتبعتره فى البحر
يلاش يتحرقو فى قطر الصعيد فى العيد
بلاش لكلب الصيد تنوليهم
خدي اللى باقي مالأمل فيهم
وإبنيلي من عضمهم فى كل حارة مقام
وزوريني مره وحيدة لو كل ألفين عام
ألم الجراح يتلم
مش باقي مني غير شوية دم
متلوثين بالهم
مرين وفيهم سم
كانه زمان شربات والنكته سكرهم
شربتهم الخفافيش فى قلب اوكرهم
مش باقي مني غير شوية دم
مقدرشي اسئيكي مواجعهم
وبرضو مقدرشي ارميكي وابعهم
يمكن فى مره تعوزي تطلبيني شهيد
هاحتاج يوميها الدم يمضي على شهادتي
مش باقي مني غير شوية قوة فى إرادتي
علي شوية شعر من خطي
حاسبي عليهم وانتى بتخطي
وانتى فى صبح الدلال بتعطري شطي
مش باقي مني غير شوية ضي في عنيه
انا مش عايزهم لو كنت يوم هالمحك وانتى بتوطي
في معركة مفيهاش ولا تيارات ولا جيش
وانتى في طبور العيش
بتبوسي ايد الزمن ينولك لقمة من حقك المشروع
مش باقي مني غير شاهقة في نفس مقطوع
بفتحلها سكه مابين رئه وضلوع
مابين غبار ودموع
وانا تحت حجر المقطم فى الدويقة بموت
انا والعطش والجوع
يئن تحت التراب وانا صوتي مش مسموع
يا حلمنا الموجوع
من المرور ممنوع
مستني لما يمر موكب سلاطينك
مش باقي مني غير شوية رحمة من طينك
علي شوية صبر من دينك
مش باقي مني غير حبة غنا تايهين
في الضلمة مش لقيين
حس الفوعلية
ولا صوت مركبي عافي فوق المعدية
ولا صوت بناتي العذاري في كل صبحية
والغنوة أمنية
ياما نفسي أقابل حبيبي وانا ع الزراعية
صوتك وصوتهم غاب
الليلة راحت عيوني تطل ع البستان
وجناين الرمان
رجعتلي توصف عناد الغل والدخان
وسحابة سودا تضلل ع الغنا الغلبان
رجعتلي توصف هبوب الموت على الألوان
رجعتلى توصف خيال الذل فى موئد الرحمن
مش باقي مني غير شوية كفر بشروقك
وانا منبع الايمان
مش باقي مني غير شوية ضي وعنية مش قادرة تلمحني
في وحدتي محني
خايف أموت مالخوف والضعف يفضحني
السجن عشش في قلبي وماشي فى شوارعك
نفس اللى بعني وخدعني بالرخيص بيعك
اشيل حمولي انا ولا هاشيل حملك
ما عودت املك شئ فيكي ولا فيا
ولا قيراط ولا بيت ولا نسمة صافية تلاغي النيل بحرية
مش باقي مني غير شوية حب جرحيني
ولا باقي مني غير شوية ضي في عنيه

الله عليك ياستاذة فله
اختيار اكثر من رائع
لشاعر عملاق
كل ودي وتقديري

المشاركة الأصلية كتبت بواسطة ماهر حامد

الله عليك ياستاذة فله
اخيار اكثر من رائع
لشاعر عملاق
كل ودي وتقديري

تسلم يااستاذ ماهر

فعلا إنسان قمه في الاحترام

قبل اي شئ وحاسس اوى هو بيقول إيه

تحياتي لك ودمت بكل خير

جميلة جدا جدا
جمال بخيت منا عارفه فقرى
شاعر من بتوع زمان زى أبوه
ملتصق بحب الوطن
زى بيرم وفؤاد حداد وبديع خيرى
أ/ ساره يوسف
وحشتينا يا أستاذه
واشتاقنا لكتاباتك الجميلة
كونى بخير أختاه
كل ودى