رابط ومايهمّش
شــــــــعر الدكتورة آمال كحيل
القاء الشــــــاعر
محمد الأنور
وما يهمش !!!
بقلم
آمال محمود كحيل
وما يهمِّش
في شرعك تنصف المظلوم
ولا تلوم ع اللي كان جاني
ولا عرفتش
تبرأ _ للأسف _ محكوم
وفته ف سجنه بيعاني
ما فكرتش بإن هناك
بريء موصوم
وكان أمله للحظة تكون
نزيه وياه وحقاني
طعنته بمنتهى القسوة
وبعت الحق بالباطل
وبتراوغ في حق الغير
وبتلاوع وبتماطل
ولساك برضه يا غرورك
بتستأسد على الحملان
يا قلبي خلاص
ماعادشي أمان
في كون موبوء بمليون داء
خلاص كل العقول طاشت
ورا الأهواء
خداع ورياء
وخبث وزيف وياما نشوف
عيون غايمة ووشوش
فيها الجشع مكشوف
نفوس ظالمة نفوس خاوية
ما تعرف حتى كلمة خوف
بتتهافت على الدنيا
وهيه لمين كانت دامت ؟
صحيح فانية
وآه يا ضمير
ندهت كتير
وصوتك ضاع بين الأصوات
بتصرخ ليه ؟
بتنده مين ؟
بشر جوه القبور أموات ؟
قلوب الناس بقت غارقة
في شبه سبات
وضرب خيال وشبه محال
في عصر المادة يتصلح
يا قلبي الحال
يا ريتني ف يوم
ألاقي دليل
ونص صريح
يقول إن الخداع والظلم
شيء مسموح
يبيح الكدب ويحرَّم
معاني الطيبة والإخلاص
يدين الود والإحساس
ما بين الناس
هاتولي دليل
عشان أقدر أحوش دمعة
سالت فوق خدي
تشكي الويل
عشان أقدر أقيد شمعة
تنور ليَّه عتمة ليل
واشوف من تاني كون تاني
فيه الرحمة بقت وصمة
فيه الطيبة بقت نقمة
يا نار قايدة
في وسط التلج ليه قايدة ؟
ما فيش فايدة
ما دام القسوة في الدنيا
بقت سايدة
ما دام أصبح
لوش الظلم ألف قناع
وألف لسان
ما دام نبض الملل فينا
قتل أجمل معانينا
وتهنا وخلف أطماعنا
هدرنا البر والإحسان
وآه يا زمان غريب خوَّان
فيه الإنسان
صبح قلبه حجر صُوَّان
ما فيش فايدة
ما فيش فايدة
أو
لمشاركة أصدقائك!
04-04-2010, 01:41 AM
ومايهمّش للشـــــــاعرة آمال كحيل
العرض الشجري
المواضيع المتشابهه
الاقسام العامة