الدقة الغزاوية المشهورة

اليوم أنا قررت أعمللكم وبالمرة أعلمكم طريقة عمل
الدقة الغزاوية المشهورة
الدَّقة طبعًا بفتح الدال .. ومشتقة من دق يدق دقاً .. دوق دوق دوق
أو بمعنى آخر .. السلطة الغزاوية

ما تاخدوش في بالكم
المهم أول إشي وقبل كل إشي عشان تكملوا معنا بدكم زبدية فخار
وكمان مطلوب مدقة الخشب ولازم ولا بد وحتمًا وضروي تكون من الخشب
يعني مدقة حديد أو عضم أو بلاستيك ما بتنفع
ولما نجمعهم مع بعض الزبدية والمدقة بيكون شكلهم زي هيك



هلقيت نخش على مكونات الدقة انتبهوا كويس يا جماعة ..
أول وأهم عنصر من مكونات الدقة هوة الفلفل الحراق ..
احنا بنحبها عبارة عن فلفل بطعم السلطة
عشان هيك بنحطش عليها أقل من 10 قرون فلفل
طبعاً الفلفل على حسب الرغبة ..
مش شرط يعني عشر قرون فلفل .. بس أكيد من دون فلفل ما بتزبط ..

تنبيه :

ملاحظة وتنويه : لو ما كنتوا غزازوة ما تحاولوش تجربوا هالعدد من الفلفل .. واللي بيحب يخاطر في حاله هو حر أنا بخلي مسئوليتي منه

وأكيد من مكونات الدقة البندورة يعني الطماطم
بكفي 3 حبات على الـ 10 قرون الفلفل .. أو برضو على حسب الرغبة
مطلوب كمان بصلة صغيرة أو نص بصلة وسط أو ربع بصلة كبيرة
معلقة صغيرة عين جرادة ..
معلقة صغيرة ملح..
زيت زيتون ..
جبنة بيضا .. للتزيين .. وممكن نستغني عنها..
زيتون حب .. حسب الرغبة..
طريقة التحضير
يقطع الفلفل في الزبدية قطعاً صغيرة بس مش كتير بالسكينة طبعاً..
وبعدين بنحط معلقة الملح ..
وبعدين معلقة عين الجرادة
وبعدين بنقطع البصلة إرباً إرباً
وبنمسك المدقة وبنبدا ندق
وبنستمر في الدق ..

ايش تعبتوا ..؟ لسة ضايل كمان .. دقوا دقوا

والله شكلكم تعبتوا من الدق ..
معلش الله يعينكم استمروا .. لحد ما يندق الفلفل والبصل كويس ..
أيواااا .. هيك كويس .. يعطيكم العافية

هلقيت بنقطع البندورة فوق الفلفل ..
وبنكمل مسيرة الدق ..
وكمان بنضل ندق ..
وضلكم دقوا لحد ما تندق البندورة كويس مع الفلفل والبصل ..
بس ديروا بالكم ما تتطرشق ..
يعني البندورة بدها شوية هدوء في الدق وشوية تفغيص
وهلقيت على حسب الرغبة بنفرك الجبنة البيضا فوق الدقة ..
مش حد يجيبلي جبنة فيتا ولا جبنة البقرات التلاتة اللي في الكرتون ..
ما بتنفع لأن المفروض جبنة بيضا بلدية يا غنمية ..

وبنحط زيت الزيتون ...
وبتتاكل بالخبز طبعاً مش بالمعلقة ولا بالشوكة والسكينة كمان
مع شوية زيتون ..

المهم بيكون منظر السلطة زي هيك




طريقة الأكل
بتقسموا الرغيف.. وبتبدؤوا الهجوم ..
وبتضلكم تغرفوا .. تغرفوا .. لحد ما تخلصوا الزبدية ..


وبالآخر باقولكم ..
بالهنا وعالشفا.. على قلوبكم

ملطوش علشان خاطر عيونكم من