بالعربي العامي ومش بالفصحي يمكن الاقي ناس تفهم وتجاوبني علي التساؤلات اللي في قلبي
لما بييجي وفد علي غزه الكهرباء بتصيير تيجي ساعتين او ثلاثه في عز دين الشوب والحر
الجواب علشان نضل نشحت علي ظهوركم يا غزازوه
علشان نملي جيوبنا بالفلوس وندعم هذه المؤسسه اللي علي كيف ابونا
وننسي الناس الغلابه اللي مش لاقيه تاكل ولا تعيش
معظم شباب غزه بيفكروا بالهجره لاي بلد كانت كويسه ولا مش كويسه
المهم الهروب من هالوضع الزفت اللي بنعيشه في هالعشره كيلو اللي الكل طمعان فيه وبده اياه استكراد يشحت عليه علشان يكبر بطنه وكرشه
كل سنتين ولا كام سنه حرب ورا حرب ورا حرب كانه الناس هنا عبيد لهذا التنظيم ولهذه الحركه .
كل مايصير سلاح صلاحيته منهيه ولا سلاح فتاك ولا كيماوي ولا اي اختراع لاي سلاح بيتجرب علي اهالي غزه كانهم صراصير بيجربه عليهم مبيد حشري يخلصوا منهم
لازم علشان اسافر لاي سبب . انسي ديني واخلاقي واعمل تنسيق للسفر . بمعني تاني مفهوم ومعروف " رشوه " مطعمه بغلاف احلي اسمه تنسيق ومصاريف علاقات عامه لتسهيل الامور الخاصه . بنضحك علي بعض وبنمشي بنفس التيار هو هو . طبعا ما الكل محبوس ومتنيل والكل قرفان وزهقان وجوعان وقلقان ومحروم وبعده يطلع من هالبلد الزفت .
اليوم انقلاب في تركيا وبكره مشكله ف اندونيسا وبعده مصيبه في الصومال . واحنا ما شاء الله قايميين بالواجب بنعزي وبندعم وبنشارك وبنتبرع من احتياجاتنا لنصره سوريا وغير سوريا والبلاد المنكوبه . واحنا المنكوبين المحتاجين التطهير من جوانا اول وبعدين التطهير من هالظلم والكذب والرياء والنفاق وحب السلطه والتفرد بالراي والهيمنه علي حقوق شعب لا حول له ولا قوه .
كل ما بتهم ناس متنيله تقول كلمه حق في الشارع وبطريقه سلميه . تقول حقنا يا عالم يكون عنا كهربا وميه ونسافر وتفتح الحدود وحقوق كتيره مسلوبه . لما تفكر هالاقليه تطلع في الشارع تطالب بحقها . ترمي بالرصاص والحبس والتعذيب ويقال عنهم متمردين ويعذبوا ويضطهدوا . اين حريه التعبير والتفكير يا عالم ديمقراطي . يا من تعيشون برغد ورفاهيه في غزه . اين هو حق الانسان الغزاوي يحكي عن حقه ويطالب بالعيش الكريم . اين هو حقك يا غزاوي ؟
مضطره اعيش في هم ونكد وحزن واضطهاد واشوف ابني وابن اخويا وابن جاري مقيد بالسلاسل ومجرم ومعتدي علي حقوق اخوه المسلم . قاتل ومعتدي ومجرم ومدمن ترامال وشحات وضايع وتايه وسكران من الحبوب والهلوسه اللي دخلت بلدنا علشان جيوب تتكسد بالفلوس وجيوب تنخرق من المال الحرام اللي بينصرف علي الحرام وعلي تهريب السلاح والمخدرات وغيره .
الحقيقه مطموسه والعدل ممنوع . ما عدش الواحد عارف يحزن علي القاتل ولا يوجدله مبرر لانه الشاب مش لاقي ياكل ولا يعالج حاله ولا امه ولا يلاقي شغل ولا يتنيل يتجوز ولا يعيش بكرامه . كل اسباب الاجرام والهجره سببها كل الاسباب اللي مغطيه في غزه العزه اللي ما عادت تعرف معني العزه ولا معني الكرامه الانسانيه او الحقوق الانسانيه .
بنعدم هذا المجرم ؟ وبنطلع مجرم تاني اكبر ؟ لانه هذا ابن فلان وهذا ابن الغلبان . لانه هذا التزوير والرشوه والكتمان عن الحقايق الواضحه الجليه في هالبلد التعيس
هذا العيله سجلها المدني انمسح من الوجود وكل افرادها ماتت او شردت بسبب الظلم والحرب والتظاهر بالقوه علي حساب شعب غلبان بيستعمل جميعه لاغراض شخصيه وفئويه وحركيه وتنظيميه ما الها دعوه بالله ولا بدين ولا بقانون ؟
بنستعمل كلام الله وقران الله وبنفسره حسب معتقداتنا وميولنا وتنظيمنا ونتمسك باقوال ما لها بالحقيقه من اصل لخدمه مصالحنا وتنظيمنا . يا عالم سيبوا كتاب الله بحاله وابعدوا عن المصالح والزيف والتضليل . بدكم تعموا الناس عن الحقيقه و تستعملوا الدين ستار تمارسوا فيه جرائمكم الفئويه والعنصريه تحت اسم الله والاسلام والقران والدين . وانتم من يستغل هذا الدين للمصالح والكراسي والتشهير
وانا بكتب هالكلمتين افضض عن الهم اللي في مخي خايفه انشره قدام الناس واما هلقيت بفكر انني ممكن زيي زي غيري اروح وراء الشمس واتهم بجرائم وتضليل وتلفيق اتهامات انا ما عملتها . ليش لازم اضل عايشه في خوف وقلق وهم اني اكتم صوتي واخبي الحق والحقيقه . هذا حال ناس كتير ساكته وصارت خرسه لانها خايفه من صوت الحق تبعها تدفع تمنه موت وسجن وتعذيب واضطهاد وظلم
محكوم علينا عمرنا كله يضيع وننحرم من حقوقنا اقل حق يا خلق الله ميه وكهربا . اقسم بالله الحيوانات والطيور لا تستطيع العيش بدون ميه وكهربا . احنا صرنا ممتهنيين اكثر من الحيوانات . الحيوانات في بلاد الخلق لها قيمه وهناك مؤسسات دوليه ترعاها وتقدم لها سبل العيش الكريم . اما نحن الغزيين فاتمني أن نعامل كحيوانات الدول المتقدمه والشعوب الراقيه .
لازم لما امرض باي مرض بسيط ممكن معالجته بدقايق اموت لنقص احتياجات الانسان الطبيه التي يجب ان تتوفر في كل بلد لرعايه المرضي والمحتاجين .
انا بدفع تامين صحي وعند دخولي احد المستشفيات لا اجد اي رعايه او علاج يضمن لي حقوقي واستغلال اموالي الخاصه بما يعود بالنفع لحياتي وحياه ابنائي .
هذا اللي عنده صداع بياخد منحه للعلاج بالخارج وتحويله كامله وتزوير في ملقات ومستندات . ليش لانه واصل ولانه ابن فلان ولانه من التنظيم هذا ولانه مهم ولانه راشي ولانه مرتشي ولانه الضماير ماتت ولانه الاخلاق انعدمت ولانه الدين والحق مات في قلوب الرؤساء والمستفيدين من هذا الجهل والتحزب في هذه البلده التي يطمع بها وفيها كل من يتمتع بالقوه والظلم والهيمنه علي حساب الناس الغلابه .
لازم نعيش في حصار وتضييق وعزله عن العالم والاهل في الخارج وكل الحياه . لاني غزاوي ؟ لاني غزاويه ؟ طب انا ماليش في تنظيمات وصرت كافره بكل الحركات والتنظيمات ولا عندي استعداد اصوت لمنظمه ولا لرئيس ولا لحركه . انا انسان اريد ان اعيش واتمتع بحقوقي الانسانيه . ولا هذا حرام وظلم ادور علي حقي واطالب فيه .
لازم ادفع انا وانت وهو وهي حياتي ثمن لهذه الحركات الفئويه والعنصريه الجاحده التي تستغل الارض والفرد لمصالحها الذاتيه هنا وفي جميع اراضي وربوع فلسطين المحتله من قبل الفلسطيينين الفئويين الان قبل الاحتلال الاسرائيلي والدولي الغاشم علي هذه الارض المتعطشه لدماء الابرياء .
ما زلنا نتتطلع للعالم لانقاذنا مما تسببنا نحن بالعيش به ورضينا بهذا الذل والامتهان لكرامتنا والانقسام وننتظر المسانده من هذه الدوله وتلك . الا يكف اضاعه الوقت والجهد والدم وبذل النفوس والشباب والارض والحقوق من اجل فئه طماعه وفئه تعتقد ان كل من لا يفكر بمنطق تفكيرها انها فئه كافره وملحده وفئه يجب التخلص منها .
اذا ما فكرت زيك وايدتك وصرت معاك في التنظيم تبعك بصير كافر وبصير خاين وبصير ملحد وممكن دمي يروح هدر واتشرد واتهم باتهامات تمس الدم والشرف والعرض لمجرد انني لا اوافقك الراي ولا اريد الانخراط في مؤسستك او تنظيمك .
براهن علي هالدوله وعلي التانيه واخرط بلدي للحروب والتشرد . ما ذنب هؤلاء اللي عايشيين يلتحفهم السماء وتاكل اجسادهم ديدان الارض . ما ذنبهم لماذا ؟
لان الفئويين نالوا وعود كاذبه من هنا وهنا بالاصلاح والتعميير وصب الاموال الي غزه للتصرف باموال اناس اخري ليس لاي فرد اخر استغلالها والتفرد بها لمصالحه الخاصه .
ولسه بنتسائل ولسه بندور علي اجابات ولسه بنفكر وخايفين ولسه عايشيين وبنعزي انفسنا بالصبر وبنقول هذا ابتلاء من الله . فعلا لا انكر انه ابتلاء وابتلاءات كثيره من الله سبحانه وتعالي . ولكن هل فكرنا كيف من الممكن ان يرفع الله هذا البلاء علي هذه الامه ؟
لابد من العوده الي الله سبحانه وتعالي
لا بد من اللجوء لكتاب الله وتنفيذ شرائعه وليس شرع القانون الفئوي والعنصري
لابد ان يكون مبدا الدين المعامله وليس فقط كلام وخطب وتدين بعيد عن الاخلاص والنيه الطيبه ومساعده الخلق وتكريم الانسان لمجرد انه انسان
لا بد ان يفحص كل انسان قلبه ويتقي الله في غيره وفي اخيه وفي وطنه وفي حقوق البشر اسلاميين او غيرهم .
المطلوب هو التوبه وتغيير النفس بالانابه والرجوع للحق ولله حتي يرفع عنا الله هذا البلاء
فكم من امم ضاعت وهدمت وانقرضت وخسفها الله بسبب الاقليه الظالمه والمضطهده لحقوق البشر .
كفانا ذل وكفانا توسل الي خلق الله واللجوء للبشر لانقاذنا مما نحن فيه
يجب علينا انقاذ انفسنا اولا وانقاذ اهلينا وافرادنا ومجتمعنا وديننا
يجب علينا ان نغير ما بانفسنا ونتحد ونكون يد واحده ضد الظلم والامتهان والفئويه والعنصريه
ان الله حرم الظلم علي نفسه . وحرمه بين البشر .
كفانا ظلم كفانا ظلم كفانا ظلم لانفسنا ولغيرنا
ان الله لا يغير بقوم حتي يغيروا ما بانفسهم
استغفر الله العظيم واتوب اليه
اللهم لا تحاسبنا بما فعل السفهاء منا
اللهم ارزقنا الصبر وثواب الصبر
انت القوي وانت القادر علي ذلك
لك الحمد والشكر وانت علي كل شيء قدير
أو
لمشاركة أصدقائك!
07-16-2016, 11:59 AM
ليش؟
العرض العادي
الاقسام العامة